الزمان : الاربعاء
الساعه : 7:15 م
أنا : بقولك يا كابتن متعرفش الانتخابات مدوها لبعد الساعة 7 انهرده ولا لاء؟
الكابتن (سائق التوك توك) : لاء لحد الساعه 7 مفيش بعد 7 يمكن يمدوها بكره
الحاجه (راكبة أخرى فى التوك توك) : اه لحد الساعه 7 انا لسه جايه،والله يابنتى واقفه من الساعه 2 الضهر.
أنا : انتخبتى مين يا حاجه؟
الحاجه:والله مش عارفه يا بنتى ابنى كان معايا
أنا : ابنك بيشتغل ايه؟ (بحقق مع الست :D)
الحاجه : مهندس دوكور
فترة صمت
الحاجه : انت انتخبت يا ابنى ؟
سائق التوك توك: لا والله يا حاجه انهرده كان زحمه اوى بس هروح انا واصحابى بكره ان شاء الله
أنا : هتنتخبوا مين؟
صاحب سائق التوك توك(الى ركب ببلاش طبعا) : أى حد ما عدا النور والحريه والعداله،انا بدرس ف الازهر بس مش هديهم صوتى.تعرفى واحده زبونه مكنتش عارفه تنتخب مين وانا بوصلها اللجنه الصبح بتقولى لا انا مش هنتخب الاخوان بقولها امال هتنتخبي مين؟ قالتلى هنتخب الحريه والعداله.الناس مش فاهمه حاجه وفرحانين بالانتخابات وخلاص.
أنا : أكيد نتيجة طبيعيه للأمية
سائق التوك توك : والله هم دول الى بيضيعوا الدنيا فى اصوات منهم بتبقى باطله وكتير والباقى السليم بيكونوا مكتشفين اسماء الى اختاروهم جوا ف اللجنه.
صمت (انا مدايئه طبعا يخرب بيت أبو الجهل)
سائق التوكتوك : رأيك ننتخب مين؟
أنا : انا عن نفسى هنتخب كذا وفلان وفلان
سائق التوكتوك : ما تشاركينا يا حاجه.
الحاجه : انا نازلة هنا يابنى،مع السلامه يابنتى
أنا : أنا كمان نازلة،مع السلامه يا حاجه
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
فى اللجنة الانتخابية
المكان : طابور مكون من 15 نفر
الزمان : الخميس
الساعة : 7:30 ص
أنا : لو سمحتى أنا عايزه انتخب عشان عندى محاضرات الساعه 9
مدرسة : الساعه كام؟
أنا : 7 ونص
المدرسة : لما تيجى 8
(ماشى وأدينا واقفين)
أنا : لو سمحت الساعه 8 الا دقيقه هتبدءوا امتى؟
مدرس: يعنى 8 وعشره 8 وربع 8 وتلت كده
(انا هموت قبل ما المواعيد تتظبط ف البلد دى)
زميلة فى الطابور : بقولك ايه انا خايفه اتلخبط وانا بنتخب هى انهى ورقه الى فيها 2؟
أنا : (شرحت الموقف كله واكتشفت ان كل الى واقفين الحمد لله مبيعرفوش يقروا ويكتبوا)
الزميلة اللى فى الطابور:انا ابنى قالى انتخب رمز كذا وكذا وكذا اما اخلص اقول لهم بقى؟
أنا : لا يا أمى محدش له حق يعرف انتى انتخبتى مين تقوليلهم ليه؟ طبقى الورق وحطيه ف الصناديق
(بصه مستغربه من الست الطيبه توحى بأن العلم فعلا نور الحمد لله)
المدرس (كان بيخرج برا اللجنه شويه ويدخل شويه) : والله احنا محظوظين امبارح جالنا 4 متعلمين والباقى مبيعرفوش يقروا ويكتبوا!
أنا أنتخبت و صوتت بس كلام بينى وبينك يا ريدر انا مش مقتنعه بالست انتخابات دى نظرا لنسبة العك المتفشية فيها،ويعوض الله يعوض الله يعوض الله.
