الجمعة، 29 يونيو 2012

فضيحة دولية و بجلاجل

ا صور اخرى لاول سلسلة بشرية ضد التحرش من هنا: http://www.facebook.com/media/set/?set=a.370034183044880.78129.245764998805133&type=3
لا للتحرش الله يحرقهم فضحونا


من يوميات صديقة كورية فى القاهرة :

"واحد مصرى ضربنى ف وشى بدل ما يعتذر عن انه قرب منى بطريقة غريبة ولمسنى. انا جبت اخرى من التحرش فى شوارع القاهره لا وكمان بيتعدوا عليا . انا مش قادرة استنى انى اخرج من المكان ده" ( و شتمت المكان اللى هو القاهرة شتمتين بالانجلش )

الكلام ده كتبته ع الفيس بوك وجالها ف اقل من 10 دقايق 54 تعليق من اصدقائها من دول مختلفة و بتزيد

طبعا حذرت ف التعليقات كل صحباتها اللى عايشين ف القاهرة " حاجات عمركم ما تتخيلوها بتحصل فى دول العالم التالت" والله بالنص كتبت كده

حاليا هى فى حالة نفسية سيئة وللانصاف قالت ان فى رجاله مصريين وقفوا معاها، وتعليق من كورية جه فيه "كل ست مصرية بتمشى ف شوارع مصر كل يوم هى بطلة"

و جيه تعليق كده ف النص "كده انا قدرت افهم انتى مش ناوية ترجعى مصر تانى ليه، شوية تافهيين"

والتحليلات بدءت وكل واحد دلى بدلوه ومن الدلاوى اللى اتدلقت " ده ناتج عن ثقافة متحفظة زيادة عن اللزوم" ، " دول معندهمش حياة محتاجين يعيشوا"

و فى النهاية قالت انها كلمت اختها اللى كانت ناوية تيجى مصر و قالتلها انها راجعه كوريا قريب لانه مش اول مره تتعرض لحاجات زى دى من سنة قضتها ف القاهره وده غير التحرش بالكلام اللى بقى اساسى فى يومها العادى من الفاظ نابية بالانجليزية الى "تقليد صوت البوسة" و هى معدية

جدير بالذكر ان ظاهرة مثل ظاهرة التحرش بتخسف الارض بما يسمى "القوة الناعمة" للدول، و تعتبر معاملة الاجانب معاملة حسنة بدلا من التحرش بيهم من ألاعمدة المتعددة للقوة الناعمة، وده الكلام الفصيح لمعنى عبارة "فضحتنا بقت بجلاجل"

هناك 10 تعليقات:

  1. موضوع مخجل فعلا ودول ما البلد دى مفيهاش أخلاق عمرها ما هتتقدم ولا هتبقى دولة محترمة ولو اتملت شيوخ لان لو ناس من جواها مش نضيف ومش محترم هيفضلوا يعملوا حاجات مش محترمة مهما كان مظهرهم
    المصيبة ان الحيوانات اللى بتعمل كده مش شايفين انهم غلطانين خالص
    ياما البنت هى اللى غلطانة ولبسها ومشيتها مش محترمة فبستفزه انه يعاكسها ودى تستاهل
    مع ان مفيش حاجة فى الدنيا ولا فى الدين اسمها ان لو فيه حد بيعمل حاجة غلط تقومه ولا تعاقبه بغلط أكبرمنه
    ياما هو ضحية ياعينى ومش لاقى يتجوز والبنات رايحين جاى بالمينى وجيب ونص عريانين على حد تعبير قريته قبل كده مع انى على حد علمى 98% من ستات مصر اللى بيتم التحرش بيهم كل يوم مهما كان السن كلهم محجبات وحتى اللى مش محجبات عمرى مشفتهم ماشين نص عريانين ولا حاجة
    ولما تقول لواحد فيهم أختك ومش عارف ايه يقول لا انا اختى مش زى البنات دول
    على اساس ان البنات التانيين دول بنات مش محترمين
    وللاسف المشكلة دى ملهاش حل غير ان الناس تنضف ولغاية ما ده يحصل بعد كام سنة ربنا يدينا العمر ونشوف الوقت ده الحل هو القانون . لو يتعمل قانون للتحرش ويتم تطبيقه فعلا كل كلب هيفكر قبل ما يعمل القرف ده انه ممكن ياخد كام سنة سجن ويضيع مستقبله فيحترم نفسه غصبا عن عينه
    بس للاسف القانون والقائمين على تطبيقه نفسهم زمان وحاليا ويمكن فى المستقبل ربنا يستر شايفين ان التحرش حلال والبنت هى اللى المفروض تدخل السجن
    لكى تحياتى وفعلا تدوينة رائعة منك ومحزنة لنا

    ردحذف
    الردود
    1. هو من ناحية مخجل هو مخجل جدا لابعد درجة
      عند حق القانون هو الرادع لكن هنضمن ازاى انه يتطبق بالفعل؟ ما استبعدش ان البنت اللى تتعرض لتحرش تروح عشان تعمل محضر يتحرشوا بيها ف القسم
      حاجات كتير اوى اوى محتاجة تتغير
      تربية الاطفال اللى طالعين جداد هم دول اللى هيفرقوا مش تعديل سلوك الكبار للاسف

      شكرا لتعليقك :)

      حذف
  2. املنا فى القادم ان يكون احلى واجمل وان نخاف الله فى تصرفاتنا حتى تتقدم بلدنا الى الامام ونحيا حياه كريمه بلا خوف ولا عدم احترام
    تحياتى ابوداود

    ردحذف
    الردود
    1. نتمنى ذلك
      شكرا لوقتك و تعليقك :)

      حذف
  3. اهتمامك بالموضوع في محله تمام.. وحتى تخوك منه ي محله برضه

    ليا رأي ف التدوينة لو تسمحي ^_^
    عايزك تتعبي نفسك شوية وتدعبسي أكتر في الموضوع شوفي بدايته .. أسبابه النفسية والاجتماعية.. انتشاره.. احصائيات.. حلول مقترحة

    كل ده تضربيه في خلاط أسلوبك الجميل ده هيطلع مقال مهم جداااااااااا وعالمي كمان

    بالتوفيق دايما

    ردحذف
    الردود
    1. الحقيقة تعليقك دفعة قوية
      انى اكون مستمره ف الرصد و التدقيق ف الظاهرة و ان شاء الله اوصل لحاجة مفيده تساعد ف حلها

      شكرا لوقتك و تعليقك :)

      حذف
  4. بصراحة مش لاقية ردّ
    فعلاً بقى سخيف أوى
    انا لبسى محتشم والحمد ومش بسلم
    أى أنثى أيا كان شكلها مش بتسلم .. بغض النظر عن المحترمين واللى ممكن لو شاف حاجة بتتقالك او لمجرد شافك ماشية لوحدك ياخد باله من من بعيد لبعيد .. إنما الكلاب كتير
    وقذرين ! ودى مشكلة دين ثم تربية ثم تعليم ! يعنى مشوار عَمرة للبنى أدمين ! ربنا يصلح حال البلد يارب ! ربنا يصلح حال الناس

    ردحذف
    الردود
    1. بالظبط
      مفيش بنت او سيدة بتسلم مهما كان لبسها بنطلون او جيبه او عباية

      البنى ادمين محتاجين يكونوا بنى ادمين

      نيللى شكرا لوقتك تعليقك فرحنى :)

      حذف
  5. العيب بالكامل مش ع البنت مهما لبست البنت وكانت محتشمة بردو بيحصلها كدة مبقاش ف اخلاق ولا ضمير الشخص اللي بيعمل كدة ميعرفش ان عندو اخت او بنت او زرجة ممكن يحصلها المفروض يراجع نفسه الف مرة قبل ما يفكر ان يبص لبنت زمان كان ف اخلاق والبنات مكنتش بيحصلها حاجة ع الرغم من انتشار المني جيب وقتها يارب ارحمنا برحمتك

    ردحذف
  6. يارب ارحمنا برحمتك
    امين

    ردحذف

speak out your mind