الأحد، 2 أكتوبر، 2011

مين الى قال ان مفيش تحرش؟


 قعدت جنب الشباك كالعاده فى امان الله وطلع بنى ادم وقعد ف الكرسى الى جنبى..عادى.بعد شويتين ابتدينا الهم.لميت نفسى واتكورت جنب الشباك ومفيش فايده شويه بالرجل وشويه بالدراع.حشرت الشنطه بينى وبينه والحمد لله لم رجله بس لسه ملمش دراعه.


 - هى الساعه كام؟
ياه ده انت قديم اوى فى حد بيتحرش بحد ويساله على الساعه دلوقتى! انا باصه من الشباك وكأنى مسمعتوش.ويحدث احتكاك بالاذرع.لا بقى انت هتظيط ولا ايه لازم اتكلم بس المشكله انى كل مره اتكلم فيها محدش بيعبرنى وبيبصولى بصه كدا غريبه مش عارفه دى معناها "اخرسى" ولا معناها "عادى يا اوختشى" ولا معناها "عيب احنا معندناش الكلام ده متفتريش ع الراجل"! وقولت لنفسى اتكلمى انطقى قولى اى حاجه والى يحصل يحصل.


-ما تحترم نفسك.
-فى ايه انا جيت جنبك (اه يا كداااااب)
-انت عارف انا بتكلم على ايه اتلم واحترم نفسك ( هو ده الى ربنا قدرك عليه!)


بعلى صوتى عشان الناس تسمع وان فى حد ينطق ابدا،ان حد ينطق..ابدا.والمهم تباع سواق العربيه جاى يقولى "الاجره يا أبله"،يعنى بتعرض لتحرش ومحدش نطق وهدفع أجره كمان! دفعت .75 قرش فكه وأداله الربع جنيه بتاعى باقى لا لا مش مسمحاه ابدا.


بما انى دلوقتى لوحدى والون ولونلى لازم اتنيل اتصرف مع الجحش ده.واحتكاك اخر بالاذرع. هو مش هينزل بقى ولا ايه؟ شديت دبوس من الايشارب وحطيت ايدى الشمال على دراعى اليمين وان شاء الله لما ينوى على الاحتكاك الجاى هيتشك.الحمد لله اتشك.(مش محتجالكو يا كلاب)




  ياربى هو مش هينزل بقى؟ انا نازله.مشيت شويه ودخلت على منطقتى واذ الاقيه ف خلقتى (الله يحرقك) لا وشوف البجاحه بيورنى انه قدامى وبيبص شايفاه ولا لاء،ماشى يالا نلعب.وطبعا وقف واستنى لحد ما انا بقيت جنبيه على الصف التانى. مشيت ربع الطريق ولسه متنيل ماشى. مشين نص الطريق ولسه موجود.المهم لفيت من شويه شوارع جانبيه وخرجت تانى على الرئيسى والحمد لله احمدك يارب غار فى داهيه.


 بس انا لسه لحد دلوقتى نفسى اعرف هى الناس مبتنطقش ليه؟ طب بلاش
بيبصولى البصه الغريبه الرهيبه المريبه دى ليه؟!


تســنيم



هناك 3 تعليقات:

  1. عشان أولا ما بقاش في الناس الشهامة و الجدعنة و كله بيبقى خايف على نفسه لحسن يتحشر و يطلع من الموضوع ببوكس في وشه و لا ضربة مطوى و كله بيقول يلا نفسي ..... و الناس بتبص بالطريقة دي و خاصة الستات اللي في سن اليأس بيقولوا في سرهم هو حد طايل

    ردحذف
  2. أنا مش هدافع عن الناس لأنهم فعلاً بيسكتوا عن الغلط كتير جداً بدعوى (و أنا مالي) أو (ماهي اللي غلطانة) و محدش فكر ولو لمرة واحدة ان ممكن ده يحصل لحد من عيلته!!
    لكن فعلاً في شباب كتير بتتكلم و بتدخل في صراعات رهيبة مع أسف هطلق عليهم (الحيوانات المتحرشة دي) و حالياً في حركات شبابية موجودة ع الساحة بتقوم بديل الشرطة (اللي هما نفسهم بيتحرشوا هما كمان) بمنع التحرش

    ردحذف
    الردود
    1. الموضوع ده كان من سنتين
      وفى خلال السنتين اتطورت محاربته بشكل واضح فعلا

      شكرا لتعليقك

      حذف

speak out your mind

حدث خطأ في هذه الأداة